દેશના વડાપ્રધાનશ્રી નરેન્દ્રભાઇ મોદીએ ઓનલાઇન વર્ચ્યુઅલના માધ્યમ થકી “આત્મનિર્ભર મહિલા શક્તિ સંવાદ” માં વિવિધ મહિલાઓ સાથે આત્મિયતાસભર સંવાદ સાધીને સરકારશ્રીની વિવિધ યોજનાઓનો લાભ લઇને આત્મનિર્ભર બનવા જરૂરી સૂચનો સાથે માર્ગદર્શન પુરું પાડ્યું હતું.

સરકારશ્રીએ ગ્રામીણ મહિલાઓને સંગઠિત કરી તેમને આર્થિક અને સામાજિક રીતે મહિલાઓને સશક્ત બનાવવાનું કાર્ય હાથ ધરીને મહિલાઓને ઘર આંગણે જ રોજગારી પૂરી પાડી છે
-જિલ્લાના મહિલા અગ્રણી શ્રીમતી ભારતીબેન તડવી



રાજપીપલા ખાતે જિલ્લાના મહિલા અગ્રણી શ્રીમતી ભારતીબેન તડવીની ઉપસ્થિતિમાં “આત્મનિર્ભર મહિલા શક્તિ સંવાદ” નો જિલ્લાકક્ષાનો કાર્યક્રમ યોજાયો

રાજપીપલા,ગુરૂવાર :- દેશના વડાપ્રધાનશ્રી નરેન્દ્રભાઇ મોદીની વર્ચ્યુઅલ ઉપસ્થિતમાં ગ્રામીણ સ્વ-સહાય જુથોની સશકત બહેનો સાથે “આત્મનિર્ભર મહિલા શક્તિ સંવાદ” ના યોજાયેલા કાર્યક્રમમાં જિલ્લાના મહિલા અગ્રણી શ્રીમતી ભારતીબેન તડવી, જિલ્લા પંચાયત કારોબારી સમિતિના ચેરમેન શ્રીમતી મમતાબેન તડવી, જિલ્લા પંચાયતના આરોગ્ય સમિતિના ચેરમેન શ્રીમતી નીલાંબરીબેન પરમાર, નાંદોદના તાલુકા પંચાયતના પ્રમુખશ્રી હરેશભાઈ વસાવા, જિલ્લા વિકાસ અધિકારીશ્રી પી. ડી. પલસાણા, જિલ્લા ગ્રામ વિકાસ એજન્સીના નિયામકશ્રી એલ.એમ. ડિંડોડ, જિલ્લાના મહિલા અગ્રણી શ્રીમતી દર્શનાબેન દેશમુખ વગેરે સહિત જિલ્લાની સ્વ-સહાય જુથોની બહેનોની ઉપસ્થિતિમાં રાજપીપલા સરદાર ટાઉનહોલ ખાતે “આત્મનિર્ભર મહિલા શક્તિ સંવાદ” ના કાર્યક્રમને દિપ પ્રાગટ્ય દ્વારા ખૂલ્લો મૂક્યો હતો.
જિલ્લાના મહિલા અગ્રણી શ્રીમતી ભારતીબેન તડવીએ તેમના ઉદ્દબોધનમાં જણાવ્યું હતું કે, ગુજરતના પનોતા પુત્ર અને દેશના વડાપ્રધાનશ્રી નરેન્દ્રભાઇ મોદી તેમજ રાજ્યના મુખ્યમંત્રીશ્રી વિજયભાઈ રૂપાણીએ મહિલાઓ આત્મનિર્ભર બને તે માટે પ્રધાનમંત્રી વિમા યોજના, કન્યા કેળવણી યોજના સહિત અનેકવિધ મહિલા ઉત્કર્ષલક્ષી યોજનાઓ અમલમાં મુકીને છેવાડાની મહિલાઓને પગભર બનાવી છે
સરકારશ્રી દ્વારા વર્ષ ૨૦૧૦ મા મિશન મંગલમ યોજના અમલમાં મુકીને ૧૦ હજાર સખીમંડળોને ૬ કરોડ રૂપિયા આપીને આત્મનિર્ભર બનાવી છે. નર્મદા જિલ્લામાં પણ ૧૦ થી ૨૦ બહેનોને ભેગા કરી એક સખી મંડળની રચના કરી છે, જેમાં એક સખીમંડળને રૂા.૧ લાખ લેખે ૨૪ સખી મંડળોને રૂા.૨૪ લાખની લોન ચૂકવીને સરકારશ્રીએ ગ્રામીણ મહિલાઓને સંગઠિત કરી તેમને આર્થિક અને સામાજિક રીતે મહિલાઓને સશક્ત બનાવવાનું કાર્ય હાથ ધરીને મહિલાઓને ઘર આંગણે જ રોજગારી પૂરી પાડી છે.
મહિલાઓ આત્મનિર્ભર બને તે માટે બેન્ક મિત્ર, દિવેટ બનાવવાની કામગીરી, વાંસની બોટલ બનાવવાની કામગીરી કરી રહ્યાં છે તેની સાથોસાથ કોવિડ-૧૯ ના સમયગાળામાં પણ સ્વ સહાય જૂથની બહેનોએ માસ્ક બનાવવાની ઉત્તમ કામગીરી હાથ ધરીને આત્મનિર્ભર બનીને રાજ્ય અને દેશમાં પોતાનું યોગદાન આપીને પ્રગતિ કરી રહ્યાં હોવાનું તેમણે જણાવ્યું હતું.
આ પ્રસંગે જિલ્લાના મહિલા અગ્રણી શ્રીમતી દર્શનાબેન દેશમુખ અને શ્રીમતી દિનાબેન સંઘવીએ કાર્યક્રમને અનુલક્ષીને પ્રસંગોચિત ઉદબોધન કર્યું હતું.
દેશના વડાપ્રધાનશ્રી નરેન્દ્રભાઇ મોદીએ ઓનલાઇન વર્ચ્યુઅલના માધ્યમ થકી યોજાયેલા “આત્મનિર્ભર મહિલા શક્તિ સંવાદ” માં વિવિધ મહિલાઓ સાથે આત્મિયતાસભર સંવાદ સાધીને સરકારશ્રીની વિવિધ યોજનાઓનો લાભ લઇને આત્મનિર્ભર બનવા જરૂરી સૂચનો સાથે માર્ગદર્શન પુરું પાડ્યું હતું. આ પ્રસંગે જિલ્લાના અન્ય તાલુકા મથકો સહિત ગ્રામ્ય વિસ્તારોમાં પણ “આત્મનિર્ભર મહિલા શક્તિ સંવાદ” ઓનલાઇન વર્ચ્યુઅલના માધ્યમ થકી ગ્રામજનોએ જીવંત પ્રસારણ નિહાળ્યું હતું.
પ્રારંભમાં જિલ્લા ગ્રામ વિકાસ એજન્સીના મદદનીશ પ્રોજેક્ટ મેનેજર શ્રી નિખીલભાઈ ચૌધરીએ સૌને આવકારી કાર્યક્રમની રૂપરેખા આપી હતી. અંતમાં જિલ્લા ગ્રામ વિકાસ એજન્સીના ડિસ્ટ્રીક્ટ કો-ઓર્ડીનેટરશ્રી અરવિંદભાઇ પ્રજાપતિએ આભારદર્શન કર્યું હતું.